جاپان کے صوبے کھاناگاوا کے شہر ہن آٹسگی میں قائم پاکستانی ریسٹورینٹ کے مالک اور ہر دل عزیز مسلم لیگی مہر جہانگیر احمد نے پاکستان مسلم لیگ ن کے بین الاقوامی امور کے سیکرٹری جنرل اور جاپان کے صدر شیخ قیصر محمود ،جاپان کے سینئیر نائب صدر ملک نور محمد اعوان کے اعزاز میں شاندار ظہرانے کا انتظام کیا جس میں کھاناگاوا صوبے کے صدر ملک امانت علی ،نائب صدر ملک یونس ، کھاناگاوا سے مرکزی سیکرٹری پبلک ریلیشن وسیم احمدکمبوہ ،سائتاما صوبے کے صدر ملک ریاض جیلانی ،سینئیر نائب صدر شیخ تنویر،پاکستان مسلم لیگ ن جاپان کی اقلیتی وِنگ کے صدر جاوید الیاس ،مجلس عاملہ کے ر’کن خواجہ عمران اور دوسرے مسلم لیگی دوستوں نے شرکت کی۔ظہرانے کے دوران پاکستان کی موجودہ سیاسی اورمعاشی صورتحال پرغور و خوض کیاگیااور جاپان میں پاکستان مسلم لیگ ن کو بہتر سے بہتر انداز میں آگے بڑھاتے ہوئے سچّے اور وفادار مسلم لیگیوں کو شامل کرنے اور ان کی پارٹی اور ملک کے لیے خدمات کواجاگر کرنے کے معاملے پرسیر حاصل گفتگو کی گئی۔پاکستان مسلم لیگ  ن  کے بین الاقوامی امور کے سیکرٹری جنرل اور جاپان کے صدر شیخ قیصر محمود نے کھاناگاوا صوبے کے ہردلعزیز مسلم لیگی اور ریسٹورینٹ کے مالک مہر جہانگیر احمد کا شکریہ ادا کیا کہ انہوں نے اس پُرتکلّف ظہرانے کا انتظام کیا اوریہ پیغام دیتے ہوئے کہاکہ ہمیں اپنے عمل سے ثابت کرنا ہے کہ ہم پاکستانی ایک باعزت اور غیورقوم ہیں۔ہم سب پاکستانی جو یہاں جاپان میں چاہے کسی بھی کاروبار سے منسلک ہیں چاہے وہ ریسٹورینٹ ہویا کاربزنس ہو ہمیں اپنے طریقہ کار سے ،اپنے اخلاق سے ایک اچھی قوم ایک اچھا پاکستانی ہونے کا ثبوت دیناہے تاکہ پوری دنیا یہ جان سکے کہ ہر پاکستانی ایک ذمے دار انسان اور سچا مسلمان ہے۔