لاہور ۔ پاکستا ن مسلم لیگ ن اوورسیز کے مرکزی سیکرٹری جنرل شیخ قیصرمحمود نے کہا ہے کہ این اے55کانتیجہ محض ٹریلر تھا ،پوری فلم این اے123میں چلے گی ۔این اے55 کی طرح این اے 123کے عوام بھی قاف لیگ، جماعت اسلامی اورتحریک انصاف کے امیدوار وں کومسترد کردیں گے۔پیپلزپارٹی کی طرف سے مسلم لیگ  ن  کے امیدوار پرویز ملک کی حمایت کااعلان خوش آئندہے۔ عام انتخابات کی طرح این اے 123کے ضمنی الیکشن میں بھی عوام مسلم لیگ  ن  کوووٹ دیں گے۔ سوئی گیس کی عدم دستیابی سمیت دوسرے بنیادی مسائل سے نجات کیلئے ووٹرز "شیر "پر اپنے اعتماد کی مہرثبت کریں ۔اپنے ایک بیان میں شیخ قیصر محمود نے مزید کہا کہ حافظ سلمان بٹ گورنر پنجاب سلمان تاثیر کی گود میں بیٹھے رہیں انہیں وہاں سے کچھ نہیں ملے گا۔پیپلزپارٹی کے سچے جیالے فوجی آمر پرویز مشرف کے نامزد گورنر پنجاب پراعتماداورنہ ان کی ڈائریکشن پرکوئی فیصلہ کرتے ہیں۔انہوں نے کہا کہ میثاق جمہوریت کی روسے پیپلزپارٹی کا پرویز ملک کی بھرپورحمایت کرنے کافیصلہ "دیرعائد درست عائد"کے مصداق ہے ۔ ذوالفقارعلی بھٹو سے بینظیر بھٹو شہیدتک جماعت اسلامی کی اینٹی پیپلزپارٹی سیاست کوجیالے فراموش نہیں کرسکتے۔انہوں نے کہا کہ جماعت اسلامی نے ہردور میں پیپلزپارٹی کی قیادت، سیاست اورحکومت کوشدیدتنقیدکانشانہ بنایا ،آج حافظ سلمان بٹ کس بنیاد پرپیپلزپارٹی کے حامیوں سے ووٹ مانگ رہے ہیں۔این اے55میں "شیر" کی کامیابی سے شیخ رشید کی دوات ٹوٹ گئی اور ٹی وی کی آوازکے ساتھ ساتھ ٹیلیفون کی گھنٹی بھی بند ہوگئی ہے۔انہوں نے کہا کہ عمران خان سیاست کوبھی کرکٹ کاکھیل سمجھتے ہیں لیکن میدان سیاست میں ان کی دال نہیں گلے گی ۔عمران خان کی میانوالی سے کامیابی میں مسلم لیگ  ن نے کلیدی کردارادا کیا تھا۔