لاہور ۔ پاکستا ن مسلم لیگ ن اوورسیز کے مرکزی سیکرٹری جنرل شیخ قیصرمحمود نے کہا ہے کہ سوئس مقدمات کھلوانے کیلئے عدالت عظمیٰ کا حکم خوش آئندہے۔آزاد عدلیہ ایک نئے پاکستان کی بنیاد بنے گی،قومی لٹیروں سے ایک ایک پائی کاحساب لیا جائے گا۔ججزکے تقررپرایوان صدرکا سرنڈر کرنا آئینی تقاضا تھا ،حکمرانوںنے کوئی احسان نہیں کیا ۔بدعنوانوں کے احتساب تک اس ملک وقوم کو بدعنوانی کی نحوست سے نجات نہیں ملے گی ۔عدلیہ پرشب خون فوجی آمر پرویزمشرف کے زوال کی بنیاد بناتھا ،صدرزرداری کو اس قسم کے ماورائے آئین اقدامات سے گریز کرنا چاہئے۔اب بھی وقت ہے حکمران صدق دل سے میثاق جمہوریت کی پاسداری کویقینی بنائیں ورنہ تاریخ انہیں بھی فوجی آمر کی طرح دیدہ عبرت بنادے گی ۔اپنے ایک بیان میں شیخ قیصر محمود نے مزید کہا کہ اگر چیئرمین نیب نویداحسن آئین اورقانون کے مطابق لٹیروں کااحتساب کرنے سے ڈرتے ہیں تووہ فوراً مستعفی ہوجائیں۔نیب کے چیئرمین کومصلحت پسند نہیں انصاف پسندہوناچاہئے ۔انہوں نے کہا کہ جوسرکاری حکام ایمانداری سے اپنے فرائض منصبی کی بجاآوری کرنے کی بجائے حکمرانوں کے ساتھ وفاداری کادم بھرتے اوران کی چاپلوسی کرتے ہیں وہ ملک وقوم کے وفادار اورہمدرد نہیں ہوتے ۔آئین کی بالادستی اورقانون کی حکمرانی کیلئے تمام طبقات کو دوسروں کے معاملات میں بے جامداخلت کرنے کی بجائے ایمانداری کے ساتھ اپنا اپناکام کرنا ہوگا ۔انہوں نے کہاکہ عدلیہ نے اپنے فیصلوں سے اپنااعتماد بحال کیا ہے ،اس لئے عوام ہرنازک مرحلے پر عدلیہ کے ساتھ کھڑے ہوجاتے ہیں۔