شیخ قیصر محمود نے ملک ریاض جیلانی کو صدر اور شیخ محمد تنویر کو سینئیر نائب صدر نامزد کردیا
 ۷فروری بروز اتوار شام سات بجے جاپا ن کے سائتاماپریفیکچر کے یاشیو شہر کے الکرم ریسٹورینٹ میں پاکستان مسلم لیگ(ن) جاپان کی تنظیم سازی کے سلسلے میں ایک اہم اجلاس پاکستان مسلم لیگ(ن) کے بین الاقوامی امور کے سیکرٹری جنرل اور جاپان کے صدر شیخ قیصر محمود کی صدارت میں منعقد ہوا جس میں مرکزی سینئیر نائب صدر ملک نور محمد اعوان نے تمام مرکزی اور مجلس عاملہ کے ارکان اور مسلم لیگی رہنما ﺅں کے ساتھ شمولیت کی۔ شیخ قیصر محمود کی قیادت میں تمام مرکزی اور مجلس عاملہ کے ارکان کو سائتاماپریفیکچرسے پاکستان مسلم لیگ(ن) جاپان کے ملک ریاض جیلانی نے اپنے ساتھیوںشیخ محمد تنویر،چوہدری ارشاد،میاں رضوان ندیم،نثار جتالہ اور دوسرے ساتھیوں کے ساتھ خوش آمدید کہا۔اجلاس کا باقاعدہ آغاز شمس علی بٹ رکن مجلس عاملہ جوکہ سٹیج سیکرٹری کے فرائض سر انجام دے رہے تھے نے تلاوت قرآن پاک کے لیے مرکزی رہنماءحافظ مہرشمس کو عوت دے کر کیا۔تلاوت قرآن پاک کے بعد جاوید نیازی نے اپنی خوبصورت آواز میں نعت رسول مقبول ﷺ بیان کی۔ جس کے بعد حافظ مہر شمس نے پاکستان مسلم لیگ (ن) کے میڈیا ایڈوائزر شیخ فیاض حسین کے ماموں جان اور کاناگاوا پریفیکچر کے مسلم لیگی رہنماءعامر کے بھائی اور سائتاماپریفیکچر کے واجد علی اعوان کے کزن جو کہ پچھلے دنوں وفات پا گئے تھے کے لیے دعائے مغفرت کی۔دعاکے بعد چوہدری ارشاد نے سب دوستوں کا شکریہ ادا کرتے ہوئے مختصر خطاب کیا۔ اس کے بعد پاکستان سے تشریف لائے ہوئے مہمان منصور الہی جو کہ دن اخبار اور ٹی وی چینل کے چیف ڈائریکٹرہیں اور یہاں جاپان میں کافی عرصہ رہ چکے ہیں نے اپنے خیالات کا اظہار کرتے ہوئے کہا کہ میں آج اس اجتماع کو دیکھ کر یہ محسوس کرتا ہوں کہ جس طرح پاکستان مسلم لیگ (ن)جاپان ۸۹۔۷۹۹۱ میں متحرک تھی آج بھی آپ سب لوگوں کا جوش و خروش ویسے ہی قائم و دائم ہے ۔ پاکستان مسلم لیگ (ن) جاپان کے مرکزی سیکرٹری مالیات میاں جاوید اقبال نے اپنے خیالات کا اظہار کرتے ہوئے کہا کہ ہم سب کو متحد ہو کر جاپان میں اور خاص طور پر پاکستان میں اپنے قائد میاں محمد نوازشریف اور میاں محمد شہباز شریف کی طاقت بنناہے۔میاں جاوید اقبا ل نے مزید کہا کہ آج اللہ کے فضل سے ہر پاکستانی میاں نوازشریف اور میاں شہباز شریف کو چاہتاہے اور مسلم لیگی ہونے کا دعوہ کرتا ہے ۔یہ ہم سب کے لیے بڑی ہی خوشی کی بات ہے لیکن ہمیں ان لوگوں سے احتیا ط کی ضرورت ہے جو صرف اپنے مفاد کے لیے وقت کے ساتھ اپنی وفاداریاں بدل لیتے ہیں۔گنما پریفیکچر کے صدر منظم اظہر حسین نے اپنے خیالات کا اظہار کرتے ہوئے کہا کہ آج وقت کا تقاضاہے کہ ہمیں پاکستان کی بہتری کے لیے اور اپنے بچوں کو مستقبل میں ایک اچھا اور ترقی یافتہ پاکستان دینے کے لیے مل کر کوشش کرنا ہوگی ۔ملک نور محمد اعوان مرکزی سینئیرنائب صدر نے اپنے خطاب میں پاکستان مسلم لیگ(ن) جاپان کی ۷۹۹۱ سے لے کر اب تک کی کاوشوں کو تفصیل کے ساتھ بیان کیا اوران تمام مسلم لیگی کارکنوں کو خراج تحسین پیش کیا جو مشکل وقت میں بھی پارٹی کے لیے قربانیاں دیتے رہے اور ڈکٹیٹر مشرف کے ظلم اور ذیادتیوں کو بڑے حوصلے سے برداشت کرتے رہے۔ملک نور محمد اعوان نے مزید کہا کہ اصل میں یہی لوگ ہیں جو پاکستان مسلم لیگ (ن) کا اثاثہ ہیں اور ان کی قربانیاں رائیگاں نہیں گئیں آج اللہ تعالی کے فضل سے ان کی قربانیوں کا پھل ملنے کا وقت آ گیاہے ۔آخر میں پاکستان مسلم لیگ (ن) کے بین الاقوامی امور کے سیکرٹری جنرل اور جاپان کے صدر شیخ قیصر محمود نے خطاب کرتے ہوئے کہا کہ آج اس اجتماع کو دیکھتے ہوئے ایسا لگ رہا ہے کہ جاپان کے اس صوبے میں پاکستان مسلم لیگ (ن) اور میاں محمد نوازشریف اور میاں محمد شہباز شریف سے پیار کرنے والے پاکستانی کس قدر جوش و جذبہ رکھتے ہیں۔شیخ قیصر محمود نے کہا کہ اسی جوش اور جذبے سے ہم نے میاں محمد نواز شریف اور میاں محمد شہباز شریف کی طاقت بن کر اپنے پاکستان کو ان مشکلات سے نکالناہے جن مشکلات کا آج ہمارے پاکستان کو سامناہے۔شیخ قیصر محمود نے ملک ریاض جیلانی،شیخ تنویر اور دوسرے دوستوں کا شکریہ ادا کرتے ہوئے کہا کہ آج کا اجتماع دیکھ کر آپ سب کا جوش و جذبہ اور پاکستان مسلم لیگ (ن) سے پیار کا اظہار کرتاہے۔اس کے بعد شیخ قیصر محمود نے سائتاماپریفیکچر کی باڈی کا اعلان کیا جس کی تفصیل اس طرح ہے۔
۱۔صدر۔ملک ریاض جیلانی ۲۔سینئیرنائب صدر شیخ محمد تنویر ۳۔ نائب صدر چوہدری ارشاد ۴۔ نائب صدر میاں رضوان ندیم ۵۔ نائب صدر نثار جتالہ ۶۔ جنرل سیکرٹری واجد علی اعوان ۷۔سیکرٹری مالیات ملک سلیم احمد ۸۔ انفارمیشن سیکرٹری معوض ٹیپو ۹۔ جوائنٹ سیکرٹری اویس انصاری
 اس کے بعدتمام عہدیداران سے حلف لیاگیا۔حلف لینے کے بعد سائتاما پریفیکچر کے صدر ملک ریاض جیلانی نے تمام مہمانوں کا شکریہ ادا کیا اورپاکستان مسلم لیگ (ن) کے بین الاقوامی امور کے سیکرٹری جنرل اور جاپان کے صدر شیخ قیصر محمود کا شکریہ ادا کرتے ہوئے ان کو اس با ت کا یقین دلایا کہ وہ اپنی تمام کابینہ کے ساتھ پارٹی کے لیے دن رات محنت کریں گے اور مسلم لیگ (ن) سائتاما پریفیکچر میں مزید فعال اور مظبوط کرنے میں کسی بھی قربانی سے دریغ نہیں کریں گے۔آخر میں تمام مہمانوں کو پر تکلف کھانا پیش کیا گیا۔