لاہور ۔ وزیراعلیٰ پنجاب کی معاون خصوصی وممبر پنجاب اسمبلی زیب جعفر نے کہا ہے کہ میاں شہبازشریف دوررس اصلاحات کی مدد سے مقامی اوربیرونی سرمایہ کاروں کااعتماد بحال کرنے کیلئے کوشاں ہیں۔وہ عوام کاتعلیمی ومعاشرتی معیاربلنداور پنجاب میں معاشی انقلاب برپاکرنے میں ضرورکامیاب ہوں گے،ہم ان کے ساتھ ہیں۔پنجاب حکومت مقامی اور بیرونی سرمایہ کاروں کوخاطر خواہ مراعات اور آئیڈیل ماحول دے گی ۔حکمران مہنگائی اوربدامنی پرقابوپانے کیلئے ٹھوس اقدامات اٹھائیں ورنہ اقتدار چھوڑدیں،عوام انہیں پانچ برس تک برداشت کرنے کیلئے تیار نہیں ہیں۔اپنے ایک بیان میں زیب جعفر نے مزید کہا کہ وفاقی حکومت کی مسلسل عدم دلچسپی اورغیرسنجیدگی کے باعث مہنگائی کیخلاف پنجاب حکومت کی کوششوں پرمنفی اثرپڑرہا ہے۔حکمرانوں کو اپنے پاس اختیارات رکھنے کا توبڑاشوق ہے لیکن وہ ملک وقوم کو ڈیلیور کرنے کیلئے تیار نہیں ہیں۔انہوں نے کہا کہ کراچی میں ٹارگٹ کلنگ اور حالیہ بم دھماکوں کے نتیجہ میں قیمتی جانوں کاضیاع قومی سانحہ ہے ، چاروں صوبوں کے عوام ان واقعات کی پرزورمذمت کرتے ہیں ۔دکھ اورغم کی اس گھڑی میں اہلیان پنجاب اپنے سندھی بھائیوں کے ساتھ ہیں ۔انہوں نے کہا کہ دہشت گردوں کوناکام بنانے کیلئے عوام پرامن رہیں اورصبر واستقلال کادامن ہاتھ سے نہ چھوڑیں۔کوئی ملک دشمن قوت ہمیں منتشر مایوس اورمرعوب نہیں کرسکتی ۔